MP-a loneitu 200 chuangin intihhlum phalna dil

Madhya Pradesh-a Satna district-a loneitu 200 chuang chuan President Ram Nath Kovind-a hnenah lehkha thawnin, thuneitute chet dan an duh loh vang leh zangnadawmna an dawn tur tihkhawtlai sak an nih avangin intihhlum phalsak turin an ngen.

President hnena lehkha thawntute hi Rashtriya Kisan Mazdur Mahasangh (RKMM) pawl hnuai ami, Stana district-a thingtlang khaw hrang hrang amite an ni. Loneitute chuan an leilet kaltlangin Jabalpur-Vindhyachal power line thlun a nih thu leh, zangnadawmna pawh engmah pek an nih loh thu an sawi. Company chuan sorkarin kaihhruaina dan a siamte a zawm lo a, an ram an laksak man engmah an dawng lo niin an sawi. Hei mai bakah hian zangnadawma pe tura an phut anih chuan company chuan thubuai siamsakah a vau zui niin an sawi bawk.