PM-in Delhi-Meerut Expressway leh EPE a hawng
Prime Minister Narendra Modi chuan nimin khan expressway siam thar pahnih–Delhi-Meerut Expressway leh India rama smart and green highway hmasa ber, Eastern Peripheral Expressway (EPE) a hawng.
PM Modi chuan Nizammudin Bridge–Delhi UP Border inkar, Delhi-Meerut Expressway thawh khatna hi hawngin, Union Minister Nitin Gadkar-a'n a ṭawiawm a ni. Hawnna inkhawm neih hnuah PM hi jeep-ah chuangin, expressway hawn thara km 6-a thuiah road show a nei zui a ni.
Km 8.360-a thui, Delhi-Meerut Expressway hi thla 18 chhunga siam zawh a ni a, he hi ramchhunga National Highway zinga 14 lane hmasa ber a ni. Cheng vaibelchhe 841.50 senga siam niin, 6-lane Expressway leh 4+4 Service lane a awm. He project thawhna tur lungphum hi kum 2015, December 31 khan Prime Minister Modi hian alo phum tawh a ni. Delhi- Meerut Expressway project hian Delhi leh Meerut inkalpawhna chak leh him zawk a siam beisei a ni.
Project pum hi kum 82-a thui tur niin, heng zingah km 27.74 chu 14-lane a siam a ni ang a, a dang chu 6-lane a siam a ni ang. Project pum thawhna atan hian cheng vaibelchhe 4975.17 ruahman a ni. He expressway-ah hian Delhi leh Dasna inkar, km 28 dawna thuiah bi-cycle track pawh siam a ni ang.
Modi hian Delhi-Meerut Expressway a hawn hnu hian Bahgpat-ah thlawkin, India rama smart and green highway hmasa ber, Eastern Peripheral Expressway a hawng leh a ni. EPE hi Haryana-a Kundli leh Palwal inkara siam a ni. Solar power hmanga tihen tur, km 135-a thui expressway hi hi cheng vaibelchhe 11,000 senga siam a ni. Solar power hman a nih bakah, meter 500 danah a sir tawn tawnah ruahtui khawlna siam a ni a, kawng dungah hian national monument 36 leh fountain 40 dah a ni bawk. He expressway siam hna hi ni 500 chhunga zawh a ni.
Eastern Peripheral Expressway (EPE) dungah hian thingkung nuai 2.5 vel phun a ni a, heng zingah hian thingkung kum 8-10 a upa tawh eng emaw zat phunsawn an ni bawk. Kawng siamna atan hian cement ton nuai 11, steel ton nuai khat hman a ni.