Karnataka cabinet siam hun tikhawtlai maithei

Karnataka-a JDS-Congress ṭangrual sorkar thara cabinet minister tur ruat hun chu UPA chairperson Sonia Gandhi leh a fapa Congress president Rahul Gandhi-te ram pawn lama an zinchhuah avangin tihkhawtlai a ni maithei nia sawi a ni.

UPA chairperson Sonia Gandhi hi health check-up nei turin nizan khan a zinchhuak a, a fapa Rahul-an a kalpui a ni. Hei vang hian Karnataka sorkar thara minister ruat tur chungchang hi June 4-5 vel hian ngaihtuah theih a ni dawn chauh nia sawi a ni. Mahse Congress' Karnataka in-charge KC Venugopal chuan party president hi zinchhuak mah se phone-a biak reng theih a nih dawn vangin a zin chhung pawhin portfolio insem hi tihfel theih a nih tur thu a sawi thung.

Ṭangrual sorkar siamtu, Congress leh JD(S)-te hian portfolio pawimawh insem chungchang an la tifel lo nia sawi a ni a, Finance, Home, Public Works Department (PWD) and Power, Irrigation and Urban Development-te an la insem fel lo a ni. Congress chuan JD(S) in portfolio a chan duh list a siamte a ngaichang mek a ni.

Pathianni kahn Chief Minister leh JD(S) hotu HD Kumaraswamy chuan party pahnihte hian portfolio insem chungchangah harsatna an la neih thu a lo sawi tawh bawk a, mahse an buaina hi chinfel thuai a ni dawn tih a sawi.

Hetih lai hian CM Kumaraswamy hi Prime Minister Narendra Modi hmu turin nimin khan Delhi-ah a kal. Hei hi CM atana lakluh a nih hnuah PM a hmuhna hmasa ber tur a ni. Delhi-ah hian Mahatma Gandhi thlan tlawhin zahna a hlan nghal bawk ang.