Public sector bank 21 ten cheng vaibelchhe 25,775 hloh

Ramchhunga public sector bank (PSB) 21-te chuan financial year 2017-2018 chhungin bank-a dik lo taka thitih leh inbumna thleng vangin cheng vaibelchhe 25,775 an hloh niin Right to Information (RTI) hmanga zawhna chhannaah tarlan a ni.

Punjab National Bank chuan thil dik lo tih hrang hrang vang hian sum a hloh hnem ber a, cheng vaibelchhe 6461.13 zet a hloh niin RTI hmanga zawttu Chandrasekhar Gaud chuan a sawi. Reserve Bank of India-a zawhna a zawh hi May 15 khan a chhanna a dawn thu a sawi a, mahse bank-a thil dik lo leh inbumna thleng chungchang erawh kimchanga pek a ni lo tih a sawi.

Kumina bank-a thil dik lo thleng langsar leh lian ber chu lunghlua sumdawng, Nirav Modi leh Mehul Choksi leh PNB official-te inthurualin an thlen kha a ni a, he thil hi Central Bureau of Investigation (CBI) chuan a chhui zui mek a ni. CBI hian PNB-a cheng vaibelchhe 12,636 tihchingpen thubuaiah Mumbai-a special CBI court-ah thubuai pahnih an ziaklut tawh a ni.

Kum 2017-2018 chhung hian State Bank of India pawhin thil dik tawk loa tihna hrang hrangah cheng vaibelchhe 2,390.75 a hloh bawk. Bank of India chuan Rs vbch 2,224.86, Bank of Baroda-in Rs vbch 1,928.25, Allahabad Bank-in Rs vbch 1,520.37, Andhra Bank-in Rs vbch 1,303.30 leh Uco Bank-in Rs vbch 1,224.64 an hloh bawk niin RTI chhannaah hian a lang.