Lok Sabha leh assembly by-poll nei

Lok Sabha bial pali leh assemby 10-ah nimin khan by-election neih a ni.

Lok Sabha by-election neihna Uttar Pradesh-a Kairana bialah chuan eptu ṭangrual leh BJP an inkhing a ni. He bialah hian vote nei maktaduai 1.7 dawn an awm a, Muslim, Jats leh Dalit voter ṭhahnem tham tak an awm. He bial BJP MP Hukum Singh-a bial hlui a ni a, mahse a thih avangin a thlaktu tur thlan a ngai a ni. Inthlanah hian BJP chuan Singh-a fanu Mrgianka Singh chu candidate-ah a dah a, Rashtriya Lok Dal (RLD) candidate Tabassum Hasan nen an inkhing a ni. RLD candidate hi Congress, Samajwadi Party leh Bahujan Samaj Party-te an thlawp a ni.

Maharashtra-a Palghar leh Bhandara-Gondia Lok Sabha bialah by-election neih a ni bawk. Heng bial pahnihte hi BJP chuan lak ngei tumin an bei nasa hle a, Union minister Smirti Irani leh Uttar Pradesh chief minister Yogi Adityanath te pawh an lo campaign tawh a ni.

Nagaland-ah Lok Sabha by-election hi neih a ni bawk. Inthlan neihna hi Nagaland Chief Minister Neihphiu Rio-a bial hlui niin, CM a nih tak avangin kumin February thla khan MP aṭangin a bang a ni. Nagaland-a Lok Sabha by-election neihnaah hian eptu pawl, Naga People’s Front (NPF) candidate chu Congress in a thlawp a, rorellai People’s Democratic Alliance (PDA) candidate nen an inbitum a, candidate dang an awm lo.

Nimin vek han West Bengal, Jharkhand, Bihar leh Meghalaya-ah assembly by-election neih a ni bawk.