India ramah ni khatah 1,50,000 test thei Enkawl dam zat 49.21% a tling tawh

Sorkar laipui chuan nimina report an tihchhuahah Covid-19 kai enkawl dam rate 49.21% a ni tawh tih tarlangin, hei hi nitina report an tihchhuah aṭanga enkawl dam rate san ber ṭum a ni

Indian Council of Medical Research (ICMR) pawhin report an tihchhuahah nitinin hma an sawn zel a, ni khatah sample 1,50,000 an test thei tawh tih tarlangin darkar 24 chhungin ramchhung hmun hrang hrangah sample 1,51,808 an test tih an tarlang. 

ICMR chuan sample 52,13,140 an test tling tawh tih an sawi a, Covid-19 enkawlna kawngah hmasawn zelin rampumah Covid-19 test theihna laboratory 837 a pawmpui tawh a ni. Heng zinga 602 hi sorkar laboratory a nih laiin 235 hi chu private laboratory a ni thung. 

Ni sarih lai a zawna Covid-19 kai hmuh chhuah tam ber ni a thlen hnuah nimin piah khan tlemin an thlahhniam hret a, nimina Health and Family Welfare Ministry report tihchhuahah erawh hri kai hmuh chhuah tam ber ni kan tawng leh a, mi 9,996-in an kai tih hmuh chhuah leh niin sing kan hnaih tawh hle.

India ram pumah mi 2,86,579-in hri an kai tawh laiin 1,41,029 chu enkawl dam an ni tawh thung a, hri kai mek 1,37,448 an la awm a ni. A zawnin ni hnih chhung chu enkawl dam hi an tam tawh zawk a ni. Hetihlai hian thihpui 8,102 an awm tawh thung.

MoHFW report tihchhuah hma darkar 24 chhung hian hri kai thar 9,996 an awm a, enkawl dam 5,823 awmin thihpui 357 an awm. Nilaini report nena khaikhin chuan enkawl dam zat hi a tlahniam hret a, report hmasaah khan 5,991 enkawl dam an nih laiin nimin report-ah erawh an tlahniam leh hret a ni. 

Thihpui pawh nimin report-ah hian an tam zawk a, nimin piah lamah kha chuan mi 279-in an thihpui.

India rama hri kai tamna ber state, Maharashtra chief minister Uddhav Thackeray chuan hri darh tur venna atana khuahkhirhna dan siamte zawm ṭhat a nih loh chuan inkharkhipna kalpui mek chu pawhseiah a vau. 

Chief minister Thackeray chuan, "State sorkar chuan thil awmdan ngun takin a thlithlai reng a ni. Inthlahdul hi a hlauhawm dawn nia a lan chuan lockdown hi kan pawtsei leh ang. Hei hi mipuite himna tura ti a nih avangin Maharashtra mipuite pawhin min thlawp ṭha ngei dawn a ni," a ti.