Haryana-in official-te smartwatch sem dawn

Haryana chief minister Manohar Lal Khattar chuan state sorkara official-te chu office hour chhunga an chetvelna chhuinan leh attendance lakna hmanrua chi khat atan smartwatch an sem dawn tih a puang.

CM chuan Sarmathla khuaa 'Vikas' rally a hmannaah he thu hi a puang a ni. GPS hmang smartwatch hi pakhat Rs 7,000 - 8,000 inkar niin sorkar chuan a tum sak vek dawn tih a sawi.

Khattar chuan, "State sorkara official zawng zawngte chuan smartwatch hi an bun vek dawn a, hemi hmang hian office hun chhunga an chetvelna te pawh chhui theih a ni dawn a, attendance chhinchhiahna atan hman a ni tel bawk ang," a ti.

Sorkar office-a bio­metric attendance marking system an hman mek chu Covid-19 hripui leng vangin tihtawp a ni a, GPS hmang smartwatch te chu attendance lakna atana hman a ni thuai dawn tih Khattar chuan a sawi bawk.

Chief Minister chuan sorkar official-te hi kar khatah vawi khat chauhte office kalin, an office kal loh ni te pawh kal anga chhinchhiah an ni fo tih a sawi. Hei vang hian office an kal tih chhinchhiahna tura anmahni ngeiin an kuta an hmeh ngai biometric attendance system hi an hmang a ni. Mahse biometric attendance system hman zawm ngam a nih rih loh avangin smartwatch hi hman a ni dawn thung a, hemi hmang hian attendance chungchanga dik lo taka thiltih ṭhin pawh a vang thei dawn a ni, tiin CM chuan a sawi.

Khattar chuan "Smartwatch hian a hmangtu official bilte chauh a chhuizui dawn a, midangin an bun chuan smartwatch hian hna a thawk thei dawn lo a ni. Haryana-a sorkar official zawng zawngte chettlatna chu kan chhui vek thei dawn a ni. Smartwatch hian central control room-ah sorkar hnathawkte awmna hmun a thawn ang a, heta ṭang hian an attendance chu chhinchhiah a ni ang" a ti.

Panchkula Muni­cipal Corporation leh Chandigarh administration-te chuan smartwatch attendance system hi an lo hmang tawh a ni.

Kum 2018-a Smart City Project hnuaiah khan Nagpur Municipal Corporation chu sorkar zinga GPS smartwatch hmang hmasa ber an ni.