J&K-ah Amit Shah a zin

Union home minister Amit Shah chu Inrinni khan ni thum cham turin Jammu and Kashmir-ah a zin. Hei hi BJP kaihhruai sorkar laipuiin kum 2019, August thlaa J&K special status pekna, Article 370 a tihtawp hnuah J&K a tlawhna hmasa ber a ni.

Amit Shah hian Inrinni khan Srinagar-a Raj Bhawan-ah meeting nei nghalin, meeting-ah hian civil official-te bakah Army, CRPF, police leh agency dang official-te an tel a, security dinhmunte an sawiho a ni.

Nimin khan Srinagar aṭangin Jammu a pan a, venhimna khauh tak hnuaiah Home Minister hian Indian Institute of Technology (IIT) campus thar a hawng. Shah hi union minister Jitendra Singh leh Dharmedra Pradhan bakah Jammu and Kashmir lieutenant governor Manoj Sinha-ten an ṭawiawm.

Campus thar a hawn hnuah Shah hian Bhagwati Nagar-ah vantlang inkhawm a nei zui nghal a ni. Shah chuan Jammu leh Kashmir-ah hmasawnna thlentir a ni dawn tih sawiin, tumahin an dang thei dawn lo tih a sawi. Hmasawn hna thawhna kawngah Jammu leh Kashmir ṭhalaiten an thawhpui chuan firfiakte chu an tluchhe mai dawn a ni, a ti. Jammu and Kashmir hmasawn hna thawhna tur hian kum 2022 kumtawpah chuan cheng vaibelchhe 51,000 ruahman theih an tum tih a sawi bawk. Firfiakte nuaibo chu an tum ber a ni tih sawiin, tharum thawhna leh firfiakte chetna avanga civil miten nunna an chan tawh lohna turin theihtawp chhuah an tum tih a sawi bawk.