TN-ah DMK MLA-ten thawmhnaw dum inbel ; Sorkarin Copper smelting plant khar turin hriattir

Tamil Nadu-a eptu party, DMK MLA-te chuan tun hnaia Thoothukudi district-a Sterlite copper smelting plant siam duh lohna lantira nawrh huaihawt zinga mi 13 lai police-te silai hmehpuahah an thih vanga lungawi lohna lantirin, nimina Assembly rorel inkawmah thawmhnaw dum an inbel.

Thoothukudi district-ah hian Sterlite Industries-in copper smelting plant a siam duh lohna lantirin mipuiten hun eng emaw chen nawrh an lo huaihawt tawh a ni. Mipuite hian copper plant siam hian boruak bawlhhlawh a siam nasa nia sawiin khar an phut a ni. May 22 khan nawrh huaihawtte leh police-te innawr buaiin, mipui lam hawiin police-ten silai an hmetpuak a, mi 13 an thi a ni.

Tamil Nadu sorkar chuan Thawhṭanni khan state Pollution Control Board hnenah copper plant hi khar turin a lo hriattir tawh a ni.

Chief Minister EK Palaniswami chuan Chennai-a reporter-te a kawmnaah, copper plant hi khar hlen a ni dawn tih a sawi. Toothukudi bial boruak pawh a ṭha chho leh tawh a, buaina siam chhunzawm tawh lo a, sorkar hmalakna thlawp turin mipuite a ngen. CM chuan bial mipuite duhdan chu a kaihhruai sorkar chuan a tihhhlawhtlin sak thu a sawi.

Hetihlai hian copper plant siamtu, Vedanta Lt chuan Sterlite Copper plant khar a ni tur chu thil pawi tak a nih thu sawiin, he plant hi kum 22 chuang an lo enkawl tawh a, Thoothukudi bial hmasawnna tur pawhin an lo thawhhlawk hle niin a sawi. Hmalak zel dan tur chu an la ngaihtuah dawn tih an thuchhuahah an tarlang bawk. He plant-a hnathawk mi 3,500 vel chu lakchhuah an ni tawh bawk a ni.

Tamil Nadu sorkar chuan nimin khan copper plant siamna tura ram pek tawh chu cancel a nih thu a sawi.