Karnataka CM-in loan ba ngaihdam dan tur puang dawn

Karnataka Chief Minister HD Kumaraswamy chuan vawiin hian loneitute loan ba ngaihdam dan tur a puang dawn tih a sawi.

HD Kumaraswamy-a party, JDS chuan inthlan dawna an party manifesto-ah an sorkar a nih chuan an state chhunga loneitute loan ba, cheng vaibelchhe 53,000 chu ngaihdam an lo tiam tawh a, CM atana Kumaraswamy lakluh a nih hnuah he thutiam hi tihhlawhtling turin BJP chuan an phut zui nghal a ni.

CM chuan finance official-te kawmin, loan ba ngaihdam dan tura ruahmanna felfai tak an siam tur thu sawiin, vawiinah he ruahmanna hi puan hman a tum a ni.

Hetih lai hian JDS nena ṭangrual sorkar siamtu, Congress party chuan loan ba ngaihdam chungchangah hian aw an chhuah duh lo a, an party manifesto-ah pawh an tarlang ve lo tih an sawi. Karnataka Pradesh Congress Committee vice president BL Shankar chuan, "Congress sorkar chuan cooperative bank aṭanga loneitute loan lak chu a lo ngaihdam sak tawh a ni. JDS hian inthlan dawnah loan ba ngaihdam hi lo tiam mah se, hemi lo tihhlawhtlin sak hi Congress tihtur a ni kher lo", a ti.

Kum 2017 June thla khan Karnataka-a Congress kaihhruai sorkar chuan loneitu ten cooperative bank-loan ba an neih aṭangin Rs 50,000 ṭheuh a ngaidam a, a loan ngaihdam sak hi a vaiin cheng vaibelchhe 8,165 a tling a ni.