Prime Minister Modi-a ram pathum tlawh turin a zin

Prime Minister Narendra Modi chu nimin khan ram pathum–Singapore, Indonesia leh Malaysia tlawh turin a zinchhuak.

PM Modi chuan a zinchhuah hmain a Facebook account-ah Asia ram pathum a tlawh tur chu sorkar laipuin Act East Policy a kalpui mek tihchakna tura hmalakna kawng khat a nih thu a sawi a, heng ram pathumte nena inzawmna leh inlaichinna ṭha leh zau zawk neih dan a ngaihtuah tur thu a sawi.

Modi hian Indonesia ram tlawh hmasa berin, Jakarta-ah President Joko Widodo nen an inkawm ang. A cham chhung hian Chief Executive Officer-te leh Indonesia-a India mi awmte pawh a hmu nghal dawn a ni.

Indonesia aṭang hian Malaysia Prime Ministerthar Dr. Mahathir Mohammed lawmpuina hlan turin Modi hi Kuala Lumpur, Malaysia-ah reilote a kawi ang.

Hemi hnu hian Singapore panin, Singapore thuneitute chu kawng hrang hrang–financial technology, skill development, urban planning leh artificial intelligence lama thawdunna ṭha zawk neih theih dante a sawipui dawn a ni. PM hian India-Singapore enterprise and innovation exhibition a tlawh nghal bawk ang.

Singapore-a a cham chhungin Modi hian Singapore President Halimah Yacob leh Prime Minister Lee Hsien Loong te a hmu dawn a, Nanyang Technological University tlawhin zirlaite nen hun an hmang ho bawk ang.