SP hruaituin ballot paper hman duh

Samajwadi Party hotu leh Uttar Pradesh chief minister hlui Akhilesh Yadav-a chuan nakkuma Lok Sabha inthlanpui neih hunah voting machine hmang loa ballot paper hmang zawk turin Election Commission a ngen.

Thawhṭanni-a state 10-a Lok Sabha leh Assembly by-election neih ṭum khan vote thlakna atana hman, EVM leh VVPAT 10,300 zinga 10% dawn chu a ṭhat loh avangin thlak a ngai a ni. Uttar Pradesh leh Maharashtra bikah phei chuan VVPAT thlak ngai hi 20% a tling nia sawi a ni.

Yadav-a chuan inthlan neihnaah vote thlakna tura khawlte a fel tawk lo a nih chuan rinhlelhna a siam ṭhin tih a sawi a, mipui nawlpui chuan vote thlakna atana khawl hman hi an ring tawk lo a ni, a ti. UP by-poll neihnaa EVM chu a bik takin Gujarat aṭanga lakluh a nih thu a sawi bawk. Nikum December thlaa Gujarat assembly inthlan neihah khan rorellai BJP chu thlan tlin nawn leh an ni.

Chief Election Commissioner OP Rawat chuan EVM chungchangah harsatna a awm lo niin Thawhṭanni khan a sawi thung. Rawat chuan VVPAT ṭhenkhatah harsatna a awm a, hengte hi by-poll neihnaah a ṭum khatna atana hman a nih thu a sawi a, mahse EVM erawh ṭha lo a awm lo niin a sawi. Election Commission chuan VVPAT eng emaw zata harsatna awm chu enfiah a nih tur thu a sawi a, heng khawlte hian nisa hnuaia dah, khaw lum lutuk leh khawih thiamlo ten an khawih avangin harsatna an tawk theih tih Commission chuan a sawi bawk.