NHRC-in Delhi sorkar leh Union Health Ministry hriattirna pe

National Human Rights Commission (NHRC) chuan Covid-19 chungchanga an hmalak dan ni 10 chhunga  insawifiah turin Delhi sorkar leh Union Health Ministry a hriattir.

Delhi pradesh congress committee president hlui Ajay Maken chuan NHRC hnenah hian complaint a thehlut a, Delhi-a Covid-19 veite tana damdawi-inah khum an indaih loh thu a sawi a, hri test-naah indaihlohna a awm thute, thi an tam tawh thute leh ruang sawngbawl chungchang tihkhawtlai a awm ṭhin thute a sawi a ni. Hengte hi human rights kalh a nih thu Ajay chuan a sawi. Hei vang hian NHRC chuan Delhi sorkar leh Union Health Ministry hnenah insawifiahna hun ni 10 chhung a pe ta a ni. 

Delhi hi Maharashtra, Tamil Nadu leh Gujarat tih lohah chuan Covid-19 kai tam berna hmun a ni mek a, he khuaah hian nimin thleng khan hri kai hi mi 12,245 an awm tawh a ni. Hri kai an pun chak avang hian damdawi-ina damlote mutna tur  khum pawh an indaih lo ṭan tawh a ni.  

Delhi Covid dashboard-ah chuan Delhi sorkar, sorkar laipui leh private ta khum 8,975 a awm a, heng zinga khum 4,840 chu Covid-19 kai enkawlte mutna atan hman mek a ni. Mi dang hri kai mi 11,259 chu in lama enkawlna pek an ni bawk.