State hrang hrangin sorkar laipui zawhna la chhang lo

Sorkar laipuiin cinema hall leh public place-a hnam hla play chungchanga an ngaihdan leh rawtna neihte thehlut tura state hrang hrangte a zawhna chu eng state mahin an la chhang lo.

Union Home minister chuan state leh UT sorkar tinte chu lehkha thawnin, India hnam hla play dan chungchangah an ngaihdan a zawt. He zawhna an chhan hlawm mai loh avangin tun thla khan hriattir nawn leh an ni a, mahse hetichung hian eng state mahin an ngaihdan hi an la thehlut lo. BJP sorkarna state 21 pawhin union ministry zawhna hi an la chhang lo a ni.

Nikum December 5 khan Home Ministry chuan cinema hall leh public place-a hnam hla play chungchanga thutlukna siamtu tur, member 12 awmna inter-ministerial committee a din a, he panel hi Special Secretary RB Sharma-an a ho a ni. Committee-ah hian ministry leh central sorkara department aṭangin Joint Secretary level officer dah tel an ni a, report hi thla ruk chhungin an thehlut ang.

Nikum October thla khan Supreme Court chuan hnam hla play laiin midang chu ding tura tihluih ngawt theih anih loh thu sawiin, an din loh avangin ram an hmangaihna an nep ta tihna a ni lo tiin a sawi a ni. Hei vang hian sorkar laipui chuan hnam hla play chungchang zirchiang tur hian expert committee hi a din ta a ni.