Central Vista-in Recreational Zone chungchangah sorkar laipui insawifiah turin ni thum chhung hun pe

Supreme Court chuan sorkar laipui chu Central Vista project siam mekin "public recreational" zone a tihbuai dan tur chungchang sawifiah turin ni thum chhung hun a pe.

Solicitor general Tushar Mehta chaun, "Parliament leh Vice President in sak a nih dawn vangin he hmunah hian recreational area a awm thei dawn lo a ni," a ti. Hemi chungchang hi justice AM Khanwilkar leh CT Ravikumar te chuan ngaihtuahin tunkar Zirtawpni hian hearing neih chhunzawm a ni ang.

Cheng vaibelchhe 20,0000 man, Central Vista Redevelopment Project hian Delhi khawpui laili laia km 3.2-a zau chei ṭhat a huam tel a, hei hi India-in zalenna a hmuh hmaa British sorkarin an lo siam kha a ni. He project hnuaiah hian sorkar building ṭhahnem tak, Parliament House leh ministry office-te chu sak ṭhat an ni dawn a ni

Hetih lai hian he project chungchangah hian petition pawh thehluh a ni fo tawh a, petition hnuhnung ber thehluttu hi social activist Rajeev Suri niin a hmaa Central Vista project atana ram hman tum danah phalna nei loa thlak danglam, environmental clearance nei lo tia thubuai thehluttu hmasa ber kha a ni.

Mahse a petition thehluhte hi Delhi High Court leh Supreme Court chuan hnawlin, project pawh hi tihtawp a ni lo bawk.

Rajeev Suri chuan a petition thehluh tharah hian Central Vista project atana hman turin ram awl ṭhenkhat chu "public recreational" aṭangin "residential" tiin an thlak a ni tiin, hei hian public recreation atana hman mek chu a nghawng tur thu a sawi. Hemi chungchangah hian court chuan sorkar laipui chu insawifiah turin a ti ta a ni.

Redevelopment project hi India ramin zalenna champha vawi 75-na denchhena zawh hman tura beisei a ni.