India ramah thla 8 hnua Covid kai hmuhchhuah tlem ni ber thleng

India ramah Thawhṭanni kha thla riat hnua coronavirus hri kai an hmuhchhuah tlem ber ni (12,428) a ni a, sorkar laipui chuan mipuite chu hunpui karah pawh inthlahdul lo turin a ngen.

State hrang hrangah nitin hri kai thar hi an tlahniam zel. Hri len tirh aṭanga hri kai hmuhchhuah tam berna Maharashtra chuan Thawhṭanni khan hri kai thar 889 an nei a, March 2020 hnua nikhat chhunga an tlem ber ṭum a ni.

Hetih lai hian Kerala chuan hri kai thar sang chuang an la nei. Thawhṭanni khan Covid kai thar 6,664 an la awm.

Ramchhunga hri kai mek, active case (1,63,816) hi ni 241 chhunga an tlem ber ṭum a ni.

Kartina hri kai thar, weekly positivity rate chu nimin khan 1.24% niin, ni 32 chhung 2% hnuailamah a awm tawh a ni. Nitina hri kai thar, daily positivity rate pawh 1.1% niin, ni 22 chhung 2% hnuailamah a awm tawh bawk. Dama puan, recovery rate chu 98.19% niin, March 2020 hnua a san ber ṭum a ni.

Supreme Court chuan Thawhṭanni khan vaccine semchhuah runpui chunchanga petition thehluh chu hnawlin, "Vaccine lak chu mipuite coronavirus laka min venghimtu"tiin a sawi.

Odisha-ah chuan mipui zinga hri kai an tam tawh em avangin endemic stage an thleng tawh a, Covid vaccine booster dose an mamawh tawh niin health department official-te chuan Thawhṭanni khan an sawi.

Moderna chuan an vaccine siam dose hniha lak chi chuan naupangte chungah virus-neutralizing antibodies a siamchhuak tih sawiin heng an data te hi global regulators hnenah an thawn thuai dawn a ni.

Sorkar chuan hunpui lai ni mah se chak leh zau zawka vaccine semchhuah hna kalpui turin state-te chu a ngen.

Khawvel pum huapin hri kai vaibelchhe 24 chuang an awm tawh a, mi nuai 49.5 in an thihpui tawh a ni.

US president Joe Biden chuan Thawhṭanni khan China, India leh Europe ram ṭhenkhata zinchhuah khapna thupek an lo siam tawh chu November 8 aṭangin hlihna tur thupek a ziak.