Sonia Gandhi-i'n party hruaitute meeting neihpui

Congress party interim president Sonia Gandhi chuan nimin khan core party leader-te meeting neihpuiin; Punjab, Uttar Pradesh, Uttarakhand, Manipur leh Goa-a assembly inthlan neih tur chungchangte an sawiho.

Meeting hi New Delhi-a party headquarters-ah an nei a, party general secretary-te leh state in-charge te an tel. Assembly inthlan lo awm tur atana inbuatsaih dan tur te, membership drive neih leh thil danga hma lak dan tur hrang hrangte an sawiho a ni.

October 16-a Congress Working Committee (CWC) meeting-ah khan November 1 aṭanga membership drive neih an lo rel tawh a, nakkum March 31 thleng neih a ni ang.

Sonia Gandhi chuan party worker-te training programme neihpui chu ngaih pawimawh a ṭul thu sawiin, "Kan ram democracy, constitution leh Congress party thuthlungte humhalh tur leh thil dik lo te do let turin inbuatsaihna ṭha tak nena kan beih a ngai a ni. BJP/RSS campaign dan tenawm takte chu kan beih let a ngai a, mipuite hmaah an dawtsawite hi kan pholan a ngai a ni," a ti.