India laka Pakistan chak lawm vangin J&K-a zirlaite thubuai siamsak

Jammu and Kashmir police-te chuan Pathiannia T20 World Cup khelhah India laka Pakistan chak an lawm vangin medical college pahniha zirlai, warden leh midangte chu Unlawful Activities (Prevention) Act (UAPA) hnuaiah thubuai an siamsak.

Police sawidanin Soura-a Sher-E-Kashmir Institute of Medical Sciences (SKIMS) leh Karan Nagar-a Govern­ment Medical College (GMC)-a zirlaite chuan Pakistan-in India wicket 10-a an hneh hnuah halpuahte halin an lam a, India auh elna hlate an chham a ni.

SKIMS-a medical student leh hostel staff-te hi UAPA Section 13 hnuaiah thubuai siam sak niin, thiam loh an chan chuan kum nga - kum sarih thleng an tang thei dawn a ni. Hei bakah hian Indian Penal Code (mipui tithlabar zawnga thuthar thehdarh) Section 505 hnuaiah thubuai siamsak an ni bawk a, kum thum thleng lungin tang tura hrem theih an ni bawk.

GMC-a zirlai leh staff-te pawh Pakistan-in India laka hnehna a chan avanga an lawm leh an lam avangin heng dan hnuaiah bawk hi an thubuai siamsak an ni ve bawk a ni.