Lakhimpur Kheri : SC-in thuhretu koh belh turin UP sorkar hriattir

Supreme Court chuan October 3-a Lakhimpur Kheri, Uttar Pradesh-a loneitute nawrh huaihawtnaa buaina chhuak chungchang ngaihtuahnaah, thil thleng mita hmutu mi 23 chauh koh an nih chhan UP sorkar a zawt a, thuhretu koh belh tur leh heng mite hi venhimna ṭha tak pe turin a hriattir nghal bawk.

SC chuan UP sorkar hnenah he buaina thlen lai hian a hmunah mi sang tel an awm nia a lan thu leh, thil thlen dan mita hmutu pawh tam tak an awm tur thu sawiin, thuhretu tam zawk thu zawtfiah turin a ti. Chief Justice NV Ramana chuan, "Loneituten kawng an zawh lai a ni a, engvangin nge eyewitness 23 chauh koh an ni?" tiin a zawt. Justice Syra Kant chuan he thil thlen lai hian a hmunah mi 4,000 - 5,000 vel an awm nia a lan thu a sawi.

Loneitu awmkhawmte hi BJP worker nia sawiten motor-in an chil a, an intibuai zui a ni. Mi pariat thiin an zingah loneitu pali an tel. Motor khalhtu zinga mi nia sawi, union home minister Ajay Mishra fapa, Ashish Mishra chu he buaina thleng chungchanga Supreme Court-in UP sorkar hmalak dan a lungawi thlak loh tih a sawi hnuah, October 11 khan man a ni.