Haryana CM Khattar lakah FIR ziah luh phût Loneitute bei tura BJP worker-te fuihah puh

Haryana chief minister ML Khattar chu loneitu nawrh huaihawtte bei tura BJP member-te fuihah puhin, a laka FIR ziahluh phutin Delhi court-ah petition thehluh a ni.

Petition hi advocate Amit Shani thehluh a ni a, October 3-a Chandigarh-a CM chenna ina Chief Minister leh BJP member-te meeting neihlai video-ah a thusawi hi chiang takin a lang a ni, a ti. Petition thehluttu chuan video-ah hian chuan CM chuan party worker-te chu loneitu nawrh huaihawt mekte bei tura state chhung hmar leh khawthlang lam district tinah volunteer 600-1,000 vel siam tur leh, jail tan leh beih let pawh inhuam turin a chah a, hetiang hian hmachhawn a nih pawhin dinhmun ṭha zawkah, hruaitu langsar takah a dah zawk dawn a ni, tiin a fuih.

CM Khattar hi buaina chawk chhuak tura fuih, pawl leh pawl inkara inhuatna thlen te, vantlang pawikhawihna thlen zawnga thu sawiahte puhin, court-ah Khattar hi ko a, dan ang taka hremna pe turin a phut thu petition thehluttu hian a sawi. Police official-te pawh CM thil tih dan hi an chhui chian theihna tura FIR thehlut tura hriattir turin a ngen bawk.