Covid-19 vaccine chak zawka semchhuah nan Sorkarin 'Har Ghar Dastak' campaign kalpui dawn

Union health minister Mansukh Mandaviya chuan Nilaini khan sorkar laipuiin Covid-19 vaccine chak zawka semchhuah a nih theih nan leh, district hnufual vaccine semchhuah tlemna hmunahte November thla ral hmaa dose bikima semchhuah hman a nih theihnan mega vaccination campaign,`Har Ghar Dastak` chu kalpui a ni dawn tih a sawi.

"Vaccination campaign lian tak kan buatsaih dawn a ni. Tun thla khat chhung lo awm turah hian healthcare worker-te chu in tinah lutin vaccine dose hnihna la thei tawh te leh dose khatna la lo te hnenah vaccine an semchhuak dawn a ni," tiin Union Health Minister chuan a sawi a ni. Beihpui thlaknaah hian state hrang hranga district 48, vaccine la 50% la awm tling lote chu a bika thlurbing an ni dawn tih a sawi bawk.

Union Health Minister hian Nilaini vek khan state leh UT-a health minister-te chu national review meeting a neihpui a, meeting-ah hian ramchhunga Covid-19 vaccine chak zawka an semchhuah dan tur kawngte an sawiho.

Minister chuan India rama puitling vaccine la thei chin zinga 77% te chuan dose khatna an la tawh a, an zinga 32% te chuan dose hnihna an la tawh tih a sawi. "Vaccine dose hnihna la la lo mi vaibelchhe 10 chuang an awm. Dose hnihna la thei chinte chuan an lak chhunzawm leh vek a ngai a ni," a ti.

Mandaviya hian mipuite mamawh zat vaccine hi a awm thu sawiin, state hrang hranga hman mai theih turin vaccine dose vaibelchhe 12 chuang a awm mek thu a sawi. "Eng district mah vaccine la loin an awm tur a ni lo. November 2021 thla ral hma ngeiin Covid-19 vaccine la thei chin hnenah dose khatna pekchhuah hman vek i tum ang u" tiin state tinte a chah.

Union Health Minister chuan State leh UT te chu local level-ah mi tam zawkin vaccine an lak theih dan ruahmanna siam turin a ti a, hmachhawp an siamte a hlawhtlin theihna tura hma la turin a chah bawk.

State leh UT zingah vaccine la thei chin, dose bikimin la 50% chuang hi Lakshadweep, Sikkim, Goa, Ladakh, Andaman and Nicobar Islands, Chandigarh, Himachal Pradesh, Mizoram, Daman and Diu, Arunachal Pradesh, leh Jammu and Kashmir-ahte an awm.