Ṭhalai eizawnna nei lo te'n UP CM hnenah lehkha thawn

Uttar Pradesh-a ṭhalai hna nei lote chuan an chief minister Yogi Adityanath hnenah state chhung school hrang hranga assistant teacher hna 1,37,500 ruak chu hnawhkhat tura ngenna lehkha an thawn.

CM hnena lekha thawntu zinga ṭhenkhat chuan an thisenin an ziak a ni.

Kumin July thla aṭang khan Lucknow-a State Council of Educational Research and Training (SCERT) office kawtah ṭhalai tam tak hian nawrh an huaihawt a, hleih nei taka hna la ṭhinah state sorkar chu an puh.

State sorkar chu upper caste candidate-te chu duhsak bik leh, hnam hnuaihnung zawkte hnualsuatah an puh.

October 21 khan police-te chuan nawrh hauihawtte hi tiang nen an hnawtdarh a, an zinga 61 chu manin jail-ah khung an ni.

Mipui lungawi lote hian President leh Governor hnenah pawh lehkha thawnin, hna an hmu thei lo a nih chuan mahni intihhlum mai loh chu kawng dang an nei tawh lo tih an sawi.

Kum 2017-ah Uttar Pradesh-a BJP thlan tlin a nih khan, mipui khawsakna lama hmasawnna hrang hrang siam bakah hna pawh tam zawk siam a tiam a, mahse ṭhalai hna nei lo hi an pung chak hle a ni.

Congress general secretary Priyanka Gandhi Vadra leh Samajwadi Party president Akhilesh Yadav-te chuan ṭhalaite ngenna hi an thlawp thu an twitter-ah an tarlang a ni.