Bihar-ah NDA-in sorkarna siam leh dawn Party malah RJD in seat la hnem ber

Bihar Legislative Assembly inthlan neih zawh takah rorellai, National Democratic Alliance (NDA) chuan hnehna changin sorkarna a siam leh dawn. Hetih lai hian eptu party, Rashtriya Janata Dal (RJD) chu party mala seat la hnem ber a ni thung. 

Assembly seat 243 awmah BJP chuan seat 74 lain, NDA hnuaia a thawhpui, chief minister Nitish Kumar kaihhruai Janata Dal (United) chuan seat 43 a la. An thawhpui dang, Hindustani Awam Morcha (Secular) leh Vikassheel Insaan Party  chuan seat li ve ve an la bawk. 

Eptu ṭangrual pawl, RJD kaihhruai Mahagathbandhan chak zawh loh chhanah Congress chu puh a ni. Lalu Yadav-a fapa, Tejashwi Yadav kaihhruai RJD hi a che ṭha hle a, seat 75 an la pha a ni. Hetih lai hian an thawhpui, Congress party chuan seat 70-ah chuhin, seat 19 chiah a la pha thung. Kum 2015 inthlan aiin Congress party hian seat riatin a la tlem zawk a ni. Left party-ten seat 16 a la bawk a ni. 

Inthlan result kimchang hriat a nih veleh prime minister Narendra Modi leh home minister Amit Shah-te chuan NDA an thlawpna avangin Bihar mipuite chungah lawmthu an sawi. 

NDA-in sorkarna an siam leh dawn a, mahse chief minister Nitish Kumar chu an party, JDU in seat a lak tlem zawk avangin CM term rukna atan dah a nih dawn leh dawn loh chu BJP kutah a innghat dawn a ni. Campaign lai khan BJP chuan NDA thlan tlin  a nih chuan Kumar hi a CM chhunzawm zel ang tiin sawi mah se, BJP hruaitu zinga Kumar thlak duh hi eng emaw zat an awm tho a ni. Hei vang hian JDU pawhin BJP hi warning pe nghalin, BJP chu a thutiam vawng tu leh sorkar siam tur chuan JDU a mamawh dawn thu party hruaitu KC Tyagi chuan a sawi lawk a ni.