G20 summit hmang turin Italy-ah PM Modi a zin

Prime minister Narendra Modi chu G20 summit hmang turin nimin khan Italy a thleng.

Ministry of external affairs chuan thuchhuah siamin, PM Modi hi Rome-ah India ambassador leh Italy sorkar official-ten an lo dawngsawng a ni. Nimin vek khan Modi hian European Council president Charles Michel leh European Commission president Ursula Von Der Leyen-ten joint meeting an nei nghal.

G20 summit-ah hian hripui len hnua khawvel huap economy leh health dinhmun te, hmasawnna hna kalpui dan leh climate change chungchangte an sawiho dawn a ni. Kum 2020-a Covid hripui a len hnuah virtual ni loa G20 summit an neihna hmasa ber a ni. G20 member-te hi Argentina, Australia, Brazil, Canada, China, France, Germany, India, Indonesia, Italy, Japan, Republic of Korea, Mexico, Russia, Saudi Arabia, South Africa, Turkey,United Kingdom, United States, leh European Union-te an ni.

PM Modi hian G20 summit neih rual hian ram hruaitu dangte hmuin, India nena an inlaichinna chungchangte a sawipui dawn a, vawiinah Vatican City tlawhin Pope Francis a hmu bawk ang. Pope nen hian minute 30 chhung an inhmu dawn tih Vatican lam pawhin an sawi.

November 1-2 hian Britain prime minister Boris Johnson sawmna angin Glasgow a pan dawn a, 26th Conference of Parties (COP-26) a hmang dawn a ni. COP-26-ah hian ram/sorkar hotu 120 an tel dawn. Conference karlakah PM Modi chuan Israel prime minister thar Naftali Bennett chu meeting a neihpui dawn bawk.