India ramah Covid-19 kai 14,348 awm thar

India ramah Ningani khan Covid-19 hri kai thar mi 14,348 an awm belh leh a, Nilainia hri kai thar 16,156 aiin 11% in an tlahniam. Hemi chhung vek hian hri kaihhnawih vanga thi 805 an awm a, Kerala state chhung bikah Covid vanga thi 708 an awm a ni.

Kerala-ah hian kartina Covid thihpui, weekly death rate chu 53% in tlahniam mah se document felfai tawk loh avanga hri vanga thi an la chhinchhiah tel loh, backlog death case 652 zet telh an nih avangin thi zat hi an pung a ni. State media bulletin chuan Ningani bika hri vanga thi chu mi 56 an ni tih a tarlang.

Sorkar laipui chuan ramchhungah chak zawka vaccine semchhuah a nih theihna turin hma a la chhunzawm zel. Ningani khan vaccine dose 74,33,392 semchhuah niin, Nilaini khan dose 25,24,138 semchhuah a ni.

Ram pumah Covid vaccine dose tluklehdingawn khat chuang semchhuah ni tawhin, India chuan Covid-19 dona kawngah mellung pawimawh tak a siam tawh.

Hri kai enkawl dam pawh pung zelin, recovery rate chu 98.19% a ni.

Ningani khan dama puan mi 13,198 an awm a, hri kai dama puan tawh zawng zawng chu mi 3,36,27,632 an ni tawh.

Hri kai mek, active case chu 1% hnuailamah awmin, 0.47% a ni mek a, March 2020 hnua a hniam ber ṭum a ni. Hri kai mek hi 1,61,334 an awm.

Kartina hri kai zat, weekly positivity rate chu 1.18% hnuailamah awmin, ni 35 chhung 2% hnuailamah a awm tawh a ni.

Nitina hri kai zat, daily positivity rate pawh 1.12% ni mekin, ni 25 chhung 2% hnuailamah a awm tawh bawk.

Hri lengin ziaawm lam pan zel mah se, ministry of home affairs chuan ramchhungah hunpui chhunga coronavirus hri inkaidarh tur venna atan Covid-19 inkaihhruaina dan a siam te chu November 30 thleng an pawtsei tih a puang.

MHA-in thupek a tih­chhuahah, contain­ment zone leh district-a positivity rate 5% aia sangah te chuan punkhawm khap chhunzawm a la ni. Covid-19 positivity rate 5% emaw a aia hniam emaw a nihna district-ahte chuan bithliah chin neia mi tam vak loa punkhawm phal a ni. Mahse heng punkhawmnate hi hi uluk taka vil zui tura tih niin, taksa inkar hlata awm lo leh mask vuah ṭha loa dan bawhchhiate chungah hremna lekkawh a ni ang.

Covid-19 khuah­khirhna leh thlahdul dan turte chu damdawi-ina ICU leh oxygen mamawh dan azirin state leh UT-te chu kartin enfiah ṭhin tura tih an ni bawk.

Hunpui chhunga Covid-19 inkaidarh tur venna atan Covid-19 inkaihruaina lungphum panga - test, hnuchhui, enkawl, vaccine lak, leh Covid-19 protocol chu ṭha taka zawm turin mipuite an chah.