By-election result puang Central-a eptu pawl che ṭha

Lok Sabha bial pali leh Assembly constituency 10-a by-election neihnaa vote tlate chu nimin khan chhiarin result puan nghal a ni. BJP chuan Lok Sabha seat khat leh assemby seat khatah chauh hnehna changin, eptu lam an che ṭha thung.

Lok Sabha by-election neihna hi Maharashtra-a bial pahnih -Palghar leh Bhandara-Gonidya bial te, Uttar Pradesh-a Kairana bial leh Nagaland ah a ni. Assembly by-election hi–RR Nagar (Karnataka), Noorpur (Uttar Pradesh), Palus-Kadegaon (Maharashtra), Maheshtala (West Bengal), Jokihat (Bihar), Shahkot (Punjab), Gomia and Silli (Jharkhand), Tharali (Uttarakhand), Ampati (Meghalaya) leh Chengannur, Kerala-ah neih a ni bawk.

Lok Sabha by-election result :
Pakghar, Maharashtra–BJP candidate Rajendra Gavit chuan hnehna a chang a, Shiv Sena candidate Shriniwas Wang chu vote 29,572 in a hneh. Gavit hi Congress minister hlui a ni a, May thla tir khan BJP a zawm a ni.

Bhandar-Gonidya, Maharashtra–NCP candidate Madhukar Kukad chu thlan tlin a ni a, amah hnaih bertu BJP candidate Hewman Patel chu vote 2,000 chuangin a hneh. NCP candidate hi Congress in a thlawp a ni.

Kairana, Uttar Pradesh–RLD candidate Tabbasum Hasan chuan hnehna changin, amah hnaih bertu BJP candidate Mriganka Singh chu vote 55,000 chuangin a hneh.

Nagaland–Nationalist Democratic Progressive Party (NDPP) chuan a khingpui NPF candidate C Apok Jamir lakah sang takin hma a hruai mek a, a chak ngei rin a ni.

Assembly by-election result :
RR Nagar, Karnataka–Congress party-in hnehna changin, an party candidate Munirathna chuan amah hnaih bertu, BJP candidate Muniraju Gowda chu vote 41162 in a hneh.

Noorpur, Uttar Pradesh–BJP sorkarna state-a by-election neihah eptu party Samajwadi party candidate Naimul Hasan chu thlan tlin a ni. Naimul Hasan hian , amah hnaih bertu BJP candidate Avni Singh chu vote 5,678 in a hneh.

Palus-Kadegaon, Maharashtra–Congress party candidate Vishwajeet Kadam thlan tlin a ni.

Maheshtala, West Bengal–Trinamool Congress chuan hnehna changin, an party candidate Dualal Chanra Das chu thlan tlin a ni.

Jokihat, Bihar–BJP-JDU sorkarna state-ah eptu pawl RJD candidate Shahnaawas Alam chu thlan tlin niin, vote 41,000 chuangin a chak a ni. He bial hi JDU MLA Sarfaraz Alam-an RJD a zawm tak avanga ruak a ni. JDU candidate chu BJP in a thlawp a, RJD candidate hi Congress leh Hindustani Awam Morcha (Secular) ten an thlawp thung.

Sahkot, Punjab–Rorellai Congress candidate Hardev Singh Ladi a chak a, amah hnaih bertu Shirmonami Akali Dal candidate Naib Sigh Kohar chu vote 38,801 in a hneh. Congress party-in hnehna a chan vang hian member 117 awmna, Punjab Vidhan Sabha-ah Congress hian seat 78 neiin, two-third majority a nei pha a ni.

Gomia leh Silli, Jharkhand–Assembly seat pahnihah JMM chuan hnehna an chang ve ve a ni. Silli bialah Seema Devi thlan tlin niin, Gombia bialah Bibata Devi thlan tlin a ni.

Tharali, Uttarakhand–BJP candidate Munni Devi Shah thlan tlin a ni.

Amapati, Meghalaya–Congress candidate Miani D Shira chuan sorkar lai NPP candidate Clement G Momin chu hnehin hnehna a chang. Congress candidate Shira hi kum 27 mi chauh niin, chief minister hlui Mukul Sangma fanu a ni.

Chengannur, Kerala–CPM candidate Saji Cherian thlan tlin a ni.