Karnataka CM-in loneitu aiawhte a hmu

Karnataka Chief Minister HD Kumaraswamy chuan Nilaini khan Bengaluru-a Vidahna Soudha-ah loneitu aiawhte a hmu a, he hunah hian Deputy Chief Minister G. Parameshwara leh hruaitu dangte pawh an tel.

CM Kuramaswamy chuan loneitute loan ba neihte chu ngaihdam vek a ni dawn tih a sawi a, hemi atana scheme an siam pawh thawh hniha kalpui a ni ang, a ti. Ruahmanna an siam dante puangzar turin ni 15 hun pek turin a dil bawk.

Loneitu lam aiawhte chuan CM ruahmanna leh rawtna siamte chu ṭha an tih thu sawiin, national commercial bank leh coopertive bank aṭanga an loan bate ngaidam vek turin an ngen a, hei hi cheng vaibelchhe 53,000 vel a tling dawn a ni.

CM chuan loan chunchanga hriat tur pawimawhte chu a dawn thawh thu a sawi a, ṭangrual sorkar a siampui Congress party a sawipui hnuah thutlukna a siam dawn tih a sawi. Kumaraswamy chuan Congress president Rahul Gandhi leh banker-te nena an sawiho hnuah sorkar chuan scheme hi a puang dawn a ni, a ti.

Karnataka-a ṭangrual sorkar siamtu, Janata Dal Secular (JDS) leh Congress party-te chuan ministry insem chungchangah inbiakna an la nei mek a, an tifel dawn hnai nia sawi a ni. Party pahnih hruaitute hian portfolio insem dan turah meeting pawh

ṭum nga zet an nei tawh a, US-a a nu damlo hruaia zin mek Congress president Rahul Gandhi pawh telephone-a an biak pawh reng thu an sawi. Party hruaituten inbiakna neihah Finance portfolio chu JDS chantir a, Congress chu Home deparmtent chantir an rel fel tawh nia sawi a ni.