Kerala-ah Nipah virus vanga thi 15 an tling tawh

1st June, 2018

Kerala state-ah Nipah virus vangin mi pakhat a thih belh leh a, he natna hri leng vanga thi hi mi 15 an tling ta niin health department official chuan a sawi.

Official chuan May 29 aṭanga Kozhikode Medical college hospital (KMCH) a enkawl, kum 28 mi Akhil chu Nilaini zan khan a thi niin a sawi a, KMCH-ah hian Nipah hri veitu midang pahnih enkawl mek an ni tih a sawi bawk.

Nipah virus hi mihring leh mihring aṭanga inkaichhawn theih a nih avangin, a hri vei finfiah tawhte nena lo inkhawih leh awmho, mi 1,353 te chu enfiah mek an ni bawk.