Karnataka: Congress-JDS in inremna siam ta

Karnataka-a ṭangrual sorkar thar siamtu, Congress leh Janata Dal Secular (JDS) chuan ministry insem chungchangah inremna an siam thei ta. Portfolio an insem dan hi Chief Minister HD Kumaraswamy chuan a puan thuai rin a ni.

Chief Minister Kumaraswamy kaihhruai ṭangrual sorkar hi May 23 khan lakluh niin, May 25 khan Assembly House-ah fiahna a paltlang a ni. Mahse hemi hnu hian ṭangrual sorkar siamtu party pahnihte hi ministry insem chungchangah inremna an siam mai theih loh avangin tun thlengin minister ruat fel an la ni lo.

Party pahnihte hi ṭum eng emaw zat an inbia a, mahse ministry pawimawhte a biki Finance changtu nih an duh ve ve avangin an inrem mai thei lo a, mahse Ningani zan khan an inbe rem thei ta niin CM chuan a sawi. Rampawna zin mek, Congress president Rahul Gandhi pawhin Ningani zan khan video conference hmangin he inremna hi a pawmpui nia sawi a ni.

Party pahnihten inremna an siam angin Karnataka-a ministry 34 zingah 22 chu Congress party in a chang dawn a, JDS in 12 a chang thung ang. JDS hian finance changin, Congress-in home ministry a chang dawn thung a ni.

Chief Minister Kumaraswamy chu thlak loin sorkar term, kum nga chhung CM hna hi a chelh dawn nia sawi a ni bawk. Kum 2019-a Lok Sabha inthlanpui neih turah pawh party pahnihte hian thawhdun chhunzawm zel an tum bawk.