Bodh Gaya beitute hrem

Patna-a special National Investigation Agency (NIA) court chuan kum 2013-a Bodh Gaya-a ṭum eng emaw zat bomb tipuaktu, mipanga te chu damchhung tang turin nimin khan a hrem.

Kum 2013, July 7-a Boda Gaya-a Buddhist temple bul vela ṭum eng emaw zat bomb tihpuah chungchangah kar hmasa Zirtawpni khan judge Manoj Kumar chuan Haider Ali, Imtiaz Ansari, Umar Siddiqui, Azharuddin Quraishi leh Mujibullah Ansari te chu thiam loh a lo chantir tawh a, nimin khan hremna tur hi tihchhuah a ni ta a ni.

Bodh Gaya-a bomb tihpuahah hian Tibet monk pakhat leh tourist pakhatin hliam an tuar a ni. Bomb hi Bodh Gaya khuaah hian minute 30 chhungin pakua tihpuah a ni a, Bihar leilunga firfiak pawikhawihna thlenna hmasa ber a ni. Firfiakte hian Bodhi thingkung hnuaiah cylinder bomb an phum tel bawk a, mahse vanneihthlak takin hei hi chu a puak ta lo a ni.

He pawikhawihna thleng chhuitu, NIA chuan bomb tipuaktute hi firfiak pawl SIMI niin a sawi. SIMI hian Myanmar sipaiten Rohingya Muslim-te laka beihpui an thlak avangin phuba lakna atan Buddhist ho hmun pawimawh hi an bei niin a sawi. Godh Baya-a pawikhawihna thlenga mawhphurtu leh phusa ber chu Haider Ali a ni a, bomb tihpuahna tur Buddhist temple chhehvel pawh hi vawi eng emaw zat alo endik hman a, temple chhungah pawh hian Buddhist puithiam lem changin a lut bawk.

Thiam loh chantir mi panga-te hi kum 2013, October thlaa Patna-a Gandhi Maidan-a bomb tihpuahnaah pawh inhnamhnawiha rinhlelh an ni bawk. He bomb hi hetih laia prime minister candidate Narendra Modi-an rally-a thu a sawi laiin tihpuah a ni a, mi pasarih an thi a, mi za telin hliam an tuar.