Karnataka CM-in inrenchemna kalpui tum ; Meeting-ah mobile phone ken khap

Karnataka Chief Minister thar HD Kumaraswamy chuan an state sum dinhmun siamṭhatna atan inrenchemna kalpui a tum a, sorkar hnathawkte chu an sum hmanral titlem turin a hrilh.

Chief Minsiter official chuan official thuchhuah siamin, car thar pek phut official-te chu an thil dil hi ngaihtuah ṭha leh turin a ti. Hei bakah hian motor thar pek phuttu department leh office hrang hrangte pawh an rawtna siamte ennawn leh tura tih an ni bawk.

Congress party nena ṭangrual sorkar siamtu, Janata Dal Security (JDS) hotu Kumaraswamy chuan official-te hnenah a pumpelh theih hram hram chuan an office-te chei thar leh thuam ṭhat tum lo turin a ti bawk.

CM hian official-te chu meeting neih laia mobile phone kenluh a lo khapsak tawh bawk. CM chuan meeting laia mobile phone hman hian rilru a lapeng a, hei hian thu pawimawh tak tak an ngaihtuahah nghawng

ṭha lo a neih palh a hlauhawm tih a sawi a ni. Hemi hma hian Department of Public Instruction chuan thuchhuah siamin, sorkar school-a zirtirtute chu school hour chhunga mobile phone an hman a lo khapsak tawh bawk a ni.

Karnataka-a ṭangrual sorkar thar siamtu, JDS leh Congress hian hun eng emaw chen an inbiak hnuah ministry insem dan turah inremna an siam thei a, JDS hian Finance changin Congress in Home department a chang dawn a ni. CM hian a ministry hi June 6 hian a tilian ang.