Ramri-a inkahna thlengah BSF sipai pahnih thi

Jammu and Kashmir-a Akhnoor sector-a International Border-ah Inrinni zan khan Pakistan sipaiten inkahhai thuthlung palzutin India lam hawiin silai an hmetpuak leh a, Border Security Force (BSF) sipai pahnih an kaphlum.

Ramri-ah hian inkahhai puan ni mah se he inremna hi palzut a ni fo a, hei vang hian May 29 khan India leh Pakistan chuan ramri hrula cheng civil miten harsatna an tawh ṭhin te pumpelh a nih theih nan leh, boruak muanawm zawk a awm theihna tura nasa zawka hma lak an lo remti tawh a ni. Mahse inremna an siam hnu lawkah Pakistan sipaite hian silai an hmetpuak leh a, hei hi India sipaite chuan chhangin ramri-ah hian an inkap zui leh nghal a ni.

Pakistan sipaiten international border leh Line of Control (LoC) kaltlanga India lam hawia silai an hmehpuah vanga thi hi kuminah mi 46 an tling tawh a, an zingah hian sipai 20 an tel a ni. Thla hmasa khan Jammu-a international border hrula cheng civil mi sang tel chu Pakistan sipaite silai hmehpuah avangin hmun him lamah an lo tlanchhe tawh bawk.