India mite chhanchhuak turin Yemen-ah Navy lawng tir
Yemen rama Socotra thliarkara cyclone tleh vanga India mi tangkhangte chhanchhuak leh hruai turin Indian Navy chuan a lawnglian, INS Sunayna a tir.
Navy thupuangtu chuan Navy-ten Yemen-a India mi tangkhangte chhanchhuah hna an thawh, 'operation Nistar' atan lawnglian hi tirh a nih thu sawiin, vawiinah he lawng hian Socotra thliarkar hi a thlen hman beisei a ni. Kar kalta kartawp lam khan cyclone Mekunu in Oman leh Socotra thliarkar hi a nuai a, chhiatna nasa tak a thlen a ni. Thlipui tleh vang hian Socotra thliarkarah hian mi 11 an thi a, chin hriat lohin mi 45 chuang an awm.