NCERT syllabus titlem dawn

Ministry of Human Resource Development (MHRD) chuan National Council of Educational Research and Training (NCERT) syllabus chu a zahveah tihtlem a tum.

Union Minister Prakash Javadekar chuan NCERT syllabus hman mek chu physical education, life skill leh value-based education-a focus mumal nei loa awm nia sawiin, hei vang hian syllabus hi tihtlem a ni dawn tih a sawi.

Minister chuan, "Education hi thil vawn leh answer paper-a ziah chhuah leh ringawt hi a ni lo. Education dik tak chuan a huam zau a, miin thiamna leh theihna a neihte hman ṭangkaina tur a ni. NCERT syllabus hian hei hi a dip zawk a, hei vang hian syllabus hi tihtlem a ni dawn a ni", a ti. National Education Policy hi June thla tawp hmain Union Cabinet hmaah pharh a nih tur thu a sawi bawk.

Right to Education (RTE) Act siamṭhat rawtna pawh July thla hian Parliament-ah pharh hman beisei a ni bawk. He dan siamṭhat rawtnaah hian Class 5–8 inkar tana inhrem awm lohna, no-detention policy siam leh state hnena examination buatsaih tura thuneihna pek a nih dante chu ennawn a ni. MHRD chuan dan siamṭhat tumnaah hian zirtirtu leh midangte hnen aṭangin class, lesson leh subject chungchangah rawtna 37,000 chuang zet an dawng tih an sawi a, heng rawtna hrang hrangte hi enfiah mek a ni, a ti.

Hei baka hian centrally-aided school-te chuan sports equiptment an dawng dawn bawk. Primary school chuan equipment hi Rs 5,000 hu an dawng thei dawn a, Upper Primary-in Rs 10,000 leh SSC leh HSC level school-ten school curriculum-a sports kalpuina turin equipment Rs 25,000 hu an dawng dawn a ni. Centrally aided school-te hian library grant Rs 5,000 aṭanga Rs 20,000 thleng an dawng thei bawk ang.