Shimla-ah tui harsat vangin nawrh huaihawt

Himachal Pradesh khawpui, Shimla-ah chuan tui indaih tawk loh vanga harsatna a thlen chhunzawm zel a, tui pek phuta nawrh huaihawt vangin police-ten mi 200 chuang thubuai an siamsak tawh.

Pathianni khan tui supply phutin hmun hrang hrangah nawrh huaihawt leh a ni a, nawrh huaihawte hian National Highway dangin, municipal corporation leh state sorkar laka an lungawi lohna thute an aupui a ni. Nawrh huaihawt zinga mi 140 lakah police-ten FIR an ziaklut nghal a ni. Hemi hma hian Chief Minister Jairam Thakur-a chenna in kawta nawrh huaihawt, Youth Congress worker 60 lakah thubuai ziahluh a lo ni tawh bawk.

CM Thakur hian Pathianni khan official-te chu meeting neihpuiin, Shimla khawpuiin harsatna a tawh mek dinhmunte an sawiho. CM chuan Inrinni khan municipal corporation chuan tui 37.63 million litres per day (MLD) dawngin, Inrinni khan 28 MLD a dawng a, heng zinga litre nuai 1.85 chu tanker hrang hrangah semdarh a ni tawh ti a sawi. CM chuan official-te chu ruahmanna siam anga tui sem darh hna thawk tur leh, tui put leh luang ral a awm leh awm lohte thlithlai reng turin a ti bawk. Khawpui chhung hmun hrang hrang 11-ah a tui pump chhuahhna tur, groundwater hand pump dah a ni dawn tih a sawi.