Nipah virus vangin Saudi-in Kerala thilsiam lakluh khap

Kerala state-a Nipah virus leng vangin Saudi Arabia chuan Kerala state aṭanga ei tur leh thlai lakluh a khap.

Nipah virus hian khawsik sang tak siamin, thluak thlengin a nghawng thei a, a lanchhuah dan chu khawsik sang, khuh ro, lun na, thawk lama harsatnate a ni. He natna hri leng vang hian Kerala-ah hian mi 16 an thi tawh a, a vei pahnih finfiah tawh chu enkawl mek niin ṭhat lam an pan nia sawi a ni. Nipah virus hi mihring leh mihring inkaichhawn theih a nih avang a vei tawhte nen lo awmdun tawh mi 2,000 vel chu an dinhmun enfiah mek a ni bawk.

May 29 khan United Arab Emirates (UAE) chuan Kerala aṭanga thil lakluh a lo khap tawh bawk a, UAE official-te chuan Kerala-a aṭanga laktum, thei, thlai leh ei tur lam chi ton 100 zet chu an rama lakluh an phal loh thu an sawi.

Kerala-a Nipah virus leng mekin nghawng hlauhawm tak a neih theih dan lantir nan Thawhṭanni-a assembly rorel inkhawmah eptu MLA Parakkal Abdulla chu hmai tuamna vuah leh kutkawr bunin a tel a, hei hi Chief Minsiter Pinarayi Vijayan leh rorellai party te chuan an sawisel nasa hle. CM chuan hri leng mek khuahkhirh a nih theih nan a ṭul angin state sorkar chuan hma a la a, health department pawhin hna an thawk nasa hle tih a sawi a, hetihlaia MLA-in hetianga thil a ti hi thil awm lo leh mawi lo tak, virus leng mek chungchanga boruak ṭha lo siam tumna a ni, a ti.