July 10 hma Chidambaram man theih loh

Aircel-Maxis thubuai kaihhnawihah union minister hlui leh Congress hruaitu P Chidambaram chu man theih lohin court chuan a hum chhunzawm zel a, July 10 thleng man theih loha humhalhna pek a ni.

Enforcement Directorate, ED chuan nimin khan he thubuai kaihhnawiha report kimchang thehlut turin Delhi court chu hun tam zawk pe turin a ngen. Court chuan he thubuai hi July 10-a ngaihtuah leh turin a dah a ni. Hemi ni vek hian Chidambarama-a fapa, Karti Chidambaram chungthu pawh ngaihtuah a ni ang.

Chidambaram hi man theih lohin court hian hum mah se, ED chuan nimin khan thu zawhfiah turin a ko a, dar 11-ah inlan turin a ti a ni.

Karti Chidambaram hi kum 2006-a a pa union minister a nih laia Aircel-Maxis ten inremna an siam chungchangah a pa thuneihna hmang ṭangkaiin Foreign Investment Promotion Board (FIPB) approval a hmuhsak nia puh a ni. Supreme Court chuan hemi chungchang chhuitu, CBI leh ED chu thla ruk chhunga tifel turin March 12 khan a lo hriattir tawh bawk.

Agency chuan kum 2006 March thla khan Aircel-Maxis foreign direct investment case-ah FIPB approval hi Karti Chidambaram hian a pe niin a sawi. Hetih lai hian Karti hi project approval cheng vaibelchhe 600 chiah approve thei a ni a, hemi chin chunglam chu Cabinet Committee on Economic Affairs (CCEA) in a pawmpui a ngai a ni, a ti. Mahse cheng vaibelcheh 3,500 chuang project-a tan hian CCEA approval lak a ni lo a ni, tiin ED chuan a sawi. Dik lo taka thiltia puh anih chungchangah nikum September thla khan ED chuan Karti Chidambaram-a thil neih leh a firm, cheng vaibelchhe 1.16 chu lo a hreksak tawh a ni.