PM-in vaccine pek ṭhat lohna district hotute meeting neihpui dawn

G20 leh COP26 hmanga ram pawn lama zin chhuak mek, prime minister Narendra Modi chuan India rama a rawn kir leh hunah ram chhunga Covid-19 vaccine pek chhuah ṭhat lohna district hotute chu virtual review meeting a neihpui dawn.

Meeting hi Nilaini hian neih tum a ni a, he hunah hian Jharkhand, Manipur, Nagaland, Arunachal Pradesh, Maharashtra, Meghalaya leh state danga vaccine pek chhuah rate chhiat zualna district 40-a district magistrate-te chu meeting a neihpui dawn a, he hunah hian heng state chief minister-te pawh hi an tel ve dawn tih Prime Minister Office chuan a sawi.

PM-in review meeting a neihpui tur district-te hi vaccine dose khatna la 50% la awm tlin lohna te an ni a, dose hnihna la pawh an la tlem hle tih PMO thuchhuah chuan a tarlang.

Ram pumah vaccine la thei chin, puitling zingah hmun lia ṭhena hmun thum velin vaccine dose khatna hi an la tawh a, a dose kima la hi 30% vel an awm tawh bawk.

Rome-a G20 summit neihah, PM Modi chuan India ramin vaccine dose tluklehdingawn khat chuang a pek chhuah tawh thu leh, nakkumah Covid vaccine hi dose tluklehdingawn nga chuang siam chhuah hman a tum thu a sawi bawk.

PM hian nimin khan G20 summit-ah tel chhunzawmin, session zawhah COP26 summit hmang turin Glasgow a pan nghal dawn a ni.

Inrinni khan PM hian Vatican City-ah Pope Francis a lo hmu tawh bawk a, Pope chu India ramah zin turin a sawm nghal a ni. Pope pawhin PM Modi sawmna hi a pawm thu sawiin, hei hi thilpek hlu tak a nih thu leh India ram tlawh chu a nghahhlelh thu a hrilh. Modi hi India ram prime minister zingah Roman Catholic kohhran hotu tlawhtu zinga pangana niin, Pope Francis nen meeting an neihna hmasa ber a ni bawk.

Modi chuan Inrinni vek khan summit karlakah France president Emmanuel Macron leh Singapore prime minister Lee HsienLoong-te chu meeting a neihpui a, nimin khan US president Joe Biden nen meeting an nei leh bawk.