India-a hri leng thawh thumna a thlen hlauthawng

India ramah Covid-19 hri kai hmuh chhuah chuan tlakhniam lam a pan laiin, ram hrang hrangah hri kai an pung thar leh avangin India ramah pawh hri leng thawh thumna a thlen mai hlauhthawnna a lian ṭan hle.

World Health Organisation (WHO) in a tarlan danin, khawvel pum huapin hri kai thar leh thihpui hi an pung thar leh. Press mite a kawmnaah WHO director-general Tedros Adhanom Ghebreyesus chuan Covid-19 chu a la reh mai dawn lo tih a sawi.

WHO hotu chuan ram hrang hrangten Covid-19 hri leng hi an thunun thei vek a ni loh chuan, he hri hi inthlak danglamin a leng thar leh zel dawn a ni, a ti. "Ram zawng zawng, ram hausa zawkte pawh huam vekin, hri chi dang insiam thar leng leh mai thei dinhmunah an awm vek a ni. Vaccine dose la kim tawh pawh hri kai leh thei dinhmunah an ding a ni," tiin a sawi.

Tun hnaiah khawvel huapin kar khata hri kai thar leh thihpui zat hi 4% leh 5% in a pung chho tawh a ni. Europe leh South-East Asia bialahte an pung nasa a, US-ah pawh an tam chho leh ṭan hle.

Hetih lai hian India ramah chuan hri leng hian ziaawm lam a pan zel a, ni khatah hri kai thar hmuhchhuah hi a zawnin ni 126 chhung chu 50,000 hnuai lam a ni tawh. Mahse hemi rual hian mi tam takah chuan hri leng thawh thumna a thlen hlauthawnna hi a la lian hle a ni.

Inrinni liam ta khan ram pumah hri kai hmuh chhuah thar mi 12,830 awmin hemi ni vek hian hri kai dama chhuak mi 14,667 an awm bawk. Hri kai mek, active case hi 1,59,272-ah tla thlain, ni 247 hnua active case an tlem ber ṭum a ni. Union health ministry chuan hri kai hmuhchhuah tawh aṭangin hri kai mek hi 0.46% a nih thu a sawi.