Karnataka cabinet tilian ; minister thar lalut

Karnataka Chief Minister HD Kumaraswamy chuan lakluh a nih aṭanga kar hnih hnu, nimin khan a cabinet tilianin minister tharte rinawmna thu tiamtira lakluh an ni.

Minister tharte lakluh inkhawm hi Raj Bhavan-ah neih a ni a, Governor Vajubhai Vala chuan rinawmna thu a tiamtir a ni.

Ṭangrual sorkar siamtu, Janata Dal Secular (JDS) leh Congress party-te hi ministry insem chungchangah an inrem mai thei lo a, hun eng emaw chen an inbiak hnuah an inrem thei ta chauh a ni. Inremna an siamah Congress lam hian ministry 22 changin, JDS hian ministry 12 a chang dawn thung. Congress hian Home, Irrigation, Health, Agriculture and Women Child Welfare Ministry-te an chang tel ang a, JDS hian Finance and Excise, Public Works Department, Education, Tourism and Transport Ministry-te a chang thung ang.

JDS chuan chief minister post a chang a, Congress hian deputy chief minister post changin CM lakluh rualin deputy CM atan hian G Parameshwara chu lakluh a lo ni tawh bawk a ni.

Nimina minister thar lakluhte hi Congress aṭangin 12 leh JDS aṭangin 9 an ni a, hei bakah hian ṭangrual sorkar thlawptu, BSP MLA awmchhun N Mahesh chu minister-ah dah a ni bawk. CM unaupa, HD Revanna pawh minister lakluh zingah a tel.