Bihar CM-in loneituten tan scheme thar siam

Bihar Chief Minister Nitish Kumar chuan sorkar laipuiin crop insurance scheme a siam chu hnawlin, an state-a loneitute pualin scheme hran a siam.

Bihar sorkarin scheme a siam thar, 'Bihar Rajya Fasal Sahayata Yojna' hian loneitu, national leh cooperative bank leh financial institution aṭanga loan la te huam thei tura siam, 'Pradhan Mantri Fasal Bima Yojana' scheme aiin a huam zau zawk dawn a ni.

Central scheme hnuaiah state leh sorkar laipui chuan premium aṭanga 49% an tum a ngai a, beneficiary-te chuan 2% an pek a ngai a ni. Sorkar laipui chua he scheme hnuaia state sorkarin insurance company-te sum a pek tur pawh a bithliah sak bawk. Kum 2016 khan Bihar sorkar chuan a share chan, cheng vaibelchhe 495 a pe a, mahse loneituten an thlai chhiat vanga zangnadawmna an dawn chu cheng vaibelchhe 221 chauh a ni tih Bihar Principal Secretary (Cooperatives ) Atul Prasad chuan a sawi. Sorkar laipui scheme siam hian loneitu, loan te chauh a huam laiin Bihar sorkar scheme siam chuan loneitute zawng zawng a huam dawn a ni, a ti.

Nitish Kumar hian central scheme hi a sawisel fo a, a hlawkna teltu chu loneitute ni loin insurance company an ni tih a sawi a ni. Hei vang hian an state tan bik central scheme hmang loin a hran a duang a ni. State sorkarin scheme a siam hnuaiah hian loneitu, a thlai chin 20% chin chhia leh chante chu zangnadawmna, hectare khatah Rs 7,500 ang chhutin pek an ni ang a, Rs 15,000 chin pek theih an ni ang. An thlai chin 20% aia tam chante chu hectare khatah Rs 10,000 angin zangnadawmna pek an ni dawn a, Rs 20,000 chin pek theih an ni ang.