Patanjali-in UP-a food park siam tum ṭhulh

Baba Ramdev-a company, Patanjali Ayurved in Uttar Pradesh-a cheng vaibelchhe 6,000 senga mega food park siam a tum chu a ṭhulh.

Patanjali Ayurved chuan Yamuna Expressway dunga mega food park project siam a tumnaah state sorkar chuan a thawhpui ṭha lo niin a sawi. Mahse UP sorkar chuan he park siam tur atana thil pawimawhte tifel turin Patanjai chu thla khat dang hun a pek belh niin a sawi thung.

Company official chuan state sorkar hnen aṭanga ram transfer tur hian Yamuna Expressway Industrial Development Authority (YEIDA) chuan clearance a hmu thei lo niin a sawi. Hei vang hian project hi cancel a nih thu Patanjali Ayurved Managing Director Acharya Balkrishna chuan a sawi. He project hi state dangah an thawh tur thu a sawi bawk.

Patanjali chuan Yamuna Expressway-a food park siam tum hi tihpuitlin a nih hun chuan kum khatah ei tur cheng vaibelchhe 25,000 man vel siamchhuah theih a ni dawn a, mi 10,000 tan hna thawh tur a siam sak thei dawn niin a lo sawi tawh a ni.