Sorkar official-te aiin nawhchizuar an ṭha zawk : BJP MLA

Uttar Pradesh-a BJP MLA Surendra Singh chuan sorkar hnathawkte bei lehin, mipuite hnenah sorkar official-ten thamna pe tura an phut a nih chuan hnek zawk mai turin a hrilh. Sorkar hnathawkte ai chuan nawhchizuarte an ṭha zawk tih a sawi.

Surendra Singh chuan nawhchizuarte chuan sum lain an hna an thawk a, mahse official-te chuan mipui sum laksakin hna an thawk tak tak lo a, hei vang hian nawhchizuarte chu an ṭha zawk a ni, tiin Thawhlehni-a public meeting-a thu a sawinaah a sawichhuak.

BJP hruaituten inhnialna chawk chhuak leh sawisel hlawh tak tak thu an sawichhuah fo vang hian Prime Minister Narendra Modi pawhin thla hmasa khan an party hruaitute chu a lo khak tawh a, an thusawite hian party hmel a tichhe thei tih pawh a lo sawilang tawh a ni. Mahse hetichung hian MLA Singh hian sawisel hlawh tak thu a la chhakchhuak fo a ni.

Singh hian tun thla tir lam khan pawngsualna thlen tam chhanah nu leh pate leh mobile phone chu a mawhphurtu niin a lo sawi tawh bawk a, nu leh pate chu an fate zalen taka chhuahvah an phalsak chungchangah a dem tih a sawi a ni.