BKU hotuin Farm Law sut turin Nov 26 thleng sorkar hun pe

Loneitu pawl, Bharatiya Kisan Union (BKU) hotu Rakesh Tikait chuan sorkar laipui chu sawisel hlawh tak, farm law thar pathum a siamte sut turin November 26 thleng hun a nei tih a sawi.

Loneitute hian farm law duh lohna lantirin Delhi border-ah kum khat dawn nawrh an huaihawt tawh a ni. Loneitu pawl leh sorkar aiawhte hi ṭum eng emaw zat inbe tawh mah se inremna an la siam thei lo. Sorkar lam hian farm law tharte hi sut leh kher loa siamṭhat a rawt a, mahse loneitu lam hian sut vek an phut a ni.

Rakesh Tikait chuan sorkar laipuiin November 26 thleng hun a neih thu leh, hemi chhunga an thil phut hi tihhlawhtlin a nih loh chuan November 27 aṭangin hmun hrang hrang aṭanga nasa zawka nawrh huaihawt leh turin loneitute chuan Delhi border hi tractor nen an pan leh dawn tih nimin khan a twitter-ah a tarlang.

Pathianni khan Tikait hian sorkar chu a lo vau tawh bawk a, Delhi border-a la awm mek, loneitute chu tihluihna hmanga chhuah tir an tum a nih chuan a nghawng na tak a awm ngei dawn a ni, a ti. Loneituten awmna tura puan-in an kaihte chu thuneituten an ṭhiahsak chuan, police station leh district magistrate office-ahte puan-in hi an kaih leh mai tur thu a sawi bawk.

Kum 2020, November 26 aṭang khan Delhi border hmun thum - Tikri, Singhu leh Ghazipur-ah loneitute hian farm law duh lohna lantir hian nawrh an huaihawt tawh a ni.