Pakistan chak lawmtute khua leh tui nihna hlihsak rawh se : Jammu BJP hotu

T20 Cricket World Cup match-a Pakistan-in India an hneh lo lawm te chu vuaka sawisak mai bakah India khua leh tui nihna an hlihsak tur a ni tiin, Jammu and Kashmir BJP leader leh MLC hlui Vikram Randhawa chuan a sawi a, a thusawi hi social media lamah a darh chak hle.

BJP thupuangtu Sunil Sethi chuan Randhawa thusawi chu an party-in an hriatpui loh thu sawiin Randhawa hian a mimal duhthlanna hmangin heng thute hi a sawi nia a rin thu a sawi. "Hmun tinah inpumkhatna hi kan duh. Kan tan chuan Jammu and Kashmir region-a mipuite hi an pawimawh dan a in ang vek a , Union Territory huamchhungah hian remna leh hmasawnna hmel kan hmu duh a ni," a ti.

PDP president leh chief minister hlui Mehbooba Mufti chuan Kashmir mite sawisak duh thu sawitu MLA hi a thusawi avang hian a chungah action lak engmah a la awm lo tih sawiin, "J&K zirlaite hian a chak zawk team chu lo ṭan avangin India laka hel ang hialah puh an ni. India hi democracy hmunpui a lo ni takzet e," tiin a ti el hial.

Randhawa chuan hmeichhe kum 22/23 mi velte chu an lu khuhin Pakistan ṭanna thu aupuiin an jacket-te an vawr a ni tiin, he thil tihnaa telte chu vuaka sawisak tlak an ni tiin, "An thlah kal zel turte pawhin India ram leilunga India auh nawmnahna hla leh Pakistan hnam hla sak ṭhin pawizia hre turin sawisak an ngai a ni," a ti. "An mahni chauh ni loin, an nu leh pa te pawhin naupang lawm nachang hre lo tak tak an hrin avangin a thiltih pawizia an hre ve tur a ni," a ti zui bawk.

"A tir aṭang khan an degree tihtawp sak turin kan nawr a,an khua leh tui nihna pawh tihtawp saka sawisak kan duh a ni," tiin Randhawa chuan a sawi.

Hei hi Randhawa-a'n buaina a thlen vawi khatna a ni tawh lo a. Thla rei vak lo liamta khan Union minister pakhat lakah eiruk thubuai a lo siam tawh a, Minister hnen aṭanga defamation notice a hmuh hnuah vantlang hmaah ngaihdam dilna a tichhuak leh hnuhnawh a ni.