Lok Sabha leh Assembly by-election result puang

Lok Sabha seat pathum leh state 14-a assembly bial 30-a by-election result chu nimin khan puan a ni.

Dadra and Nagar Haveli, Himachal Pradesh-a Mandi leh Madhya Pradesh-a Khandwa-ah Lok Sabha by-election neih a ni a, assembly by-election hi state 14 - Assam ( seat 5), West Bengal (4), Madhya Pradesh (3), Himachal Pradesh (3), Meghalaya (3), Bihar (2), Karnataka (2), Rajasthan (2) te bakah Andhra Pradesh, Maharashtra, Mizoram, Nagaland, Haryana leh Telangana-ah seat khat ṭheuhah neih a ni bawk.

Lok Sabha by-election-ah hian Shiv Sena-ten Dadra and Naga Haveli-ah hnehna an chang a, Himachal Pradesh-ah Indian National Congress (INC) chakin, Madhya Pradesh-ah Bharatiya Janata Party (BJP) an chak thung.

State assembly by-election result tihchhuahah Andhra Pradesh-ah Yuvajana Sramika Rythu Congress Party (YSRCP) chuan hnehna an chang a, vote tla aṭangin 76% chuang an hmu pha a ni. Bihar-ah chuan Kushehswar Asthan bialah rorellai, Janata Dal (United) party chakin, Tarapur bialah eptu pawl Rashtriya Janata Dal (RJD) an chak thung.

Haryana-ah Indian National Lok Dal (INLD) an chak. Elelnabad biala by-election neihah hian candidate 19 an awm. Bialtu MLA Abhay Singh Chauta chuan sorkar laipuiin farm law pathum a siamthar duh lohna lantirin January thla khan a bang a, hei vang hian inthlan hi buatsaih a ni. Mahse by-election-ah hian MLA bang ta, Abhay Singh Chautala bawk chu thlan tlin leh a ni.

Himachal Pradesh-ah chuan eptu pawl, INC chu Lok Sabha bakah assembly by-election neihna seat pathumah an chak vek.

Karnataka-ah BJP leh INC-in seat khat ve ve an la a, Madhya Pradesh-ah BJP-in seat hnih leh INC-in seat khat an la a ni.

Maharashtra-a by-election neihna bial khatah INC an chak a, Rajasthan-ah seat pahnihah INC bawk an chak ve ve a ni. Telangana-ah BJP an chak thung.

West Bengal-a inthlan ṭhat neihna bial pali-ah rorellai, chief minister Mamata Banerjee kaihhruai Trinamool Congress candidate-te an chak vek bawk. CM chuan an party candidate-te lawmpuina tichhuakin, an hnehna chan chu mipuite tana hnehna a ni a, Bengal mipuite chuan insawimawina leh inṭhendarhna politics hnawl a, hmasawnna dik tak duha an ṭanrual zia an tilang a ni, a ti.