LS Speaker-in YSRC MP-te banna pawmsak

Lok Sabha speaker Sumitra Mahajan chuan Andhra Pradesh tana special category status pek phuttu, YSR Congress (YSRC) party MP panga-ten MP an nihna aṭanga banna an thehluh chu Nilaini khan a pawmsak.

YSRC MP-te hian April 6 khan banna hi an thehlut a, speaker hian hei hi June 6-ah a pawmsak chauh a ni.

Andhra Pradesh-a rorellai, Telugu Desham Party (TDP) chuan speaker-in tlai tawh tak hnua MP-te banna a pawmsak chu BJP leh YSRC-ten an state-a by-election pumpelhna tura an ruahmanna niin a sawi. TDP MP Kesineni Srinivas chuan, "People Representation Act 1951 hnuaiah Lok Sabh seat by-election hi sorkarin a term hman zawhna tura kum khat aia tlem hun a la neih chuan buatsaih a ngai dawn lo a ni. 16th Lok Sabha session hmasa ber hi June 4, 2014 khan neih a ni a, kumin June 6-a speaker-in banna a pawm tak chauh avangin sorkar term la neih hi kum khat a tling tawh lo a, hei vang hian by-election pumpelhna turin hei hi an ruahman a ni", a ti.

YRSC te thiltih chu lemchanna mai a ni tiin, Srinivasa chuan engkim chu a hma aṭangin BJP nen an lo ruahman lawk vek niin a puh. YRSC hotu YS Jagan Mohan Reddy chuan CBI-in an chhui tur laka inchhanhim tumin BJP hi a thurualpui niin a sawi.