Karnataka minister tharte chanpual la sem lo

Karnataka Chief Minister HD Kumaraswamy kaihhruai sorkara miniser thar turte chu Nilaini khan rinawmna thu thiam tira lakluh an ni a, mahse minister tharte chanpual tur hi tihfel a la ni lo.

Janata Dal Secular (JDS) leh Congress party ṭangrual sorkara minister tur lakluh tharte ni mi 25 niin, Congress aṭangin 14, JDS aṭangin pakua leh an thawhpui Bahujan Samaj Party (BSP) leh KPJP aṭangin pakhat ve ve an ni.

Party pahnihte hi ministry 34 chu 2:1 a insem turin an lo inrem tawh a, Congress hian ministry 22 changin JDS in 12 a chang dawn a, chief minister post an chang tel a ni. Chief Minister Kumaraswamy leh deputy chief minister G Parameshwara te telin cabinet member hi 27 an awm tawh a ni.

Minister 25 lakluh thar zingah 11 chu Old Mysuru bial ami an ni a, Bengaluru City leh Coastal Karnataka region aṭagin pathum ve ve, Hyderbad-Karnataka leh Mumbai-Karnatakar region aṭangin pali ve ve an awm bawk.

JDS chuan minister atan hian Vokkaligas hnam mi paruk ruatin, Congress in pahnih a ruat bawk. Hnam khat aṭang minister nei ngah ber an ni. Lingayat hnam aṭangin party pahnihte hian minister pahnih ve ve an dah bawk. Dalit hnam pathum, Scheduled Tribe pakhat leh Other Backward Class aṭangin mi pali-te chu minister-ah hian dal tel an ni. Minister zingah Kristian pakhat leh Muslim pahnih an awm bawk a ni.

Minister thar 25 zingah hian Congress hruaitu leh film star Jayamala chu hmeichhe awmchhun a ni. Minister 13-te chu ṭum khat minister an nihna tur a ni.