Hospital ICU-a AC chhiat vangin damlo panga thi

Uttar Pradesh-a Kanpur-a Hallet Hospital-a Intensive Care Unit (ICU)-a air-conditioning system a chhiat vangin ICU-a damlo panga an thi nia sawi a ni.

He hospital hi Lala Lajpat Rai Hospital tia sawi a ni bawk a, sorkar hnuaia Ganesh Shankar Vidyarthi Memorial Medical College nena thawkdun an ni.

ICU-a AC hi Ningani zan khan a chhia nia sawi a ni a, damlo panga an thih hnuah midangte chu hospital dangah sawn an ni. District magistrate Surendra Singh chuan air-conditioner pahnih dah nghal turin a hriattir a, hei bakah hian AC chhiat vanga damlo thi nia sawi chu chhui chiang turin a ti bawk.

ICU-ah hian damlo 11 awmin an zingah hian naupang pali an tel. Damlo chhungte hian AC chhiat vangin mi panga an thi niin sawi mah se, hospital thuneitute chuan an pha thung. Hospital principal Navneet Kumar chuan, "Air-conditioning unit pahnih, tonne 10 leh tonne 16-te kan nei a, harsatna eng emaw awm mah se siamṭhat leh nghal a ni" tiin, thihna chu AC chhiat vanga thleng a nih loh thu a sawi. 

Damlo pahnih chu heart attack vanga thi niin, pahnih chu hun rei tak natna khirh tak lo tuar tawh an ni bawk tih a sawi. Mahse damlo chhungte chuan ICU-a AC chu doctor-te an awm lai chauhin a ṭha niin an sawi a, doctor-te awm loh laia hman theih a nih ngai loh vangin 'fan' hman pawh an dil a, mahse thuneituten an phalsak lo niin an sawi.

Nikum khan Uttar Pradesh-a Gorakhpur-a sorkar hospital, Baba Raghav Das Medical College-ah oxygen indaih loh vangin darkar 48 chhungin naupang damlo 30 an lo thi tawh bawk a ni.