Rajnath Singh-an Kupwara district a tlawh

Jammu and Kashmir-a cham mek, Union Home Minister Rajnath Singh-an nimin khan Kashmir hmarlama Kupwara district tlawhin, ramri hrula chengte a hmu.

Minister hi Jammu and Kashmir Chief Minister Mehmooba Mufti-i leh Minister of State in Prime Minister's Office (PMO) Jitendra Singh-ten an ṭawiawm a ni. Home Minister hian border area-a cheng tualchhung mite kawmin, an harsatna tawhte a ngaihthlaksak a ni. Hei bakah hian district police line tlawhin, ram tana nunna hlantu police martarte zahna a hlan bawk.

Singh hian nimin vek Srinagar aṭangin Jammu a pan leh nghal a ni. Minister hian Jammu and Kashmir security dinhmun enfiah turin ni hnih chamin J&K hi a tlawh a ni.

Minister-in J&K a tlawh lai mek lai, nimin zing khan Kurpwar district-a Haril area-a army patrolling chu firfiakten an bei. Ningani khan Kupwara-a Keran Sector-a firfiakten ramri paltlangin sipaite an bei bawk a, sipai pakhat thiin midang pakhatin hliam a tuar.